ساعة عصاري ونسمة صيف معديــــــــه
على الخدود سلمت وقالت لي ياصبيـــــــه
الحزن ليه جواكي متخبي والعين مطفيـــه
رديت عليها السلام وقلت يانسمة هوا وتمر
من غيره غابت فرحتي وشربت كاس المر
والقلب للي يعرفه وحالي في الهوا مايســر
ردت وقالتلي يامحيراهم مين اللي بكاكــي
قولي على الزين اللي من الكل سكنتيه جواكي
مين اللي قلبك معاه ومن غيره خلاكي
قلتلها عقله وحكمته توزن فسيح الكون
قلتلها قلبه جميل و بالحنان مسكون
وقلبي يحسب خطوته ومعاه منين مايكون
قالتلي طيب اشكري ربك على النعمه
ايه تاني قلبك يريده ليه راحت البسمه
قلتلها نفسي أكون أقربله مـن النسمه
نفسي أكون شمسه مايشوفش غير نورها
وبقلبي أشرب دمعته ومايتكوي بنارها
وأكون في قلبه جنته يحلف بأزهاراها
ويكون معايا في ترتيلي لكتاب الله
ويكون إمامي في صلاتي ومانسجد لغيرالله
ويكون لنا تسبيح وورد و كل يوم نقراه
وتكون عيونه الضي ماشوفش غير بيهم
قلبه وروحه وفرحته أعيش أنا ليهم
وماتحسبيش اننا اتنين قلبه وروحه دايبه انا فيهم
ردت عليا وقالت مريت اسلم على الحلوين
وكنت فرحانه وجايبه من العطور رياحين
سألت وجاوبتي ويارتني أملك للألم تسكين
قلتها يانسمه عدت بلاد وبلاد
عندي أمانه تسلميها للي عن عيوني بعاد
وتجيبي منهم خبر يريح اللي اتقاد
قوليله يانسمه وذكريه بيا
قوليله من كتر المحبه في قلبي فاض بيا
قوليله من حزني الضحكه مخفيه
عدي وقوليله بنت قلبك مافي شئ يداويها
والطب فيها احتار ولاشئ يشفيها
غير رحمه من رب العباد وقلب يرويها
قوليله يانسمه يكفيني منه الصوت
قوليله لما بعد قلبي رماه الموت
ليست هناك تعليقات:
إرسال تعليق